बझाङ: प्रधानमन्त्री शेरबहादुर देउवाले सुदूरपश्चिमका बाढीपहिरो प्रभावित क्षेत्रको निरीक्षण गरेका छन् । त्यसक्रममा देउवाले विभिन्न जिल्लाका सुरक्षा निकायसँग छलफल गरे ।
लगातारको वर्षाका कारण आएको बाढीपहिरोमा परी सुदूरपश्चिम प्रदेशमा धनजनको ठूलो क्षति भएको छ । त्यसैको निरीक्षणका लागि देउवा सुदूरपश्चिम पुगेका हुन् ।
डोटीमा भएको क्षतिबारे जानकारी लिएर प्रधानमन्त्री देउवासहितको टोली बझाङ सदरमुकाम चैनपुर पुगेको हो । जिल्लाका सुरक्षा निकायका प्रमुखहरूले क्षतिका बारेमा ब्रिफिङमा गरेका थिए । देउवाले बाढीपहिरो प्रभावित क्षेत्रका नागरिकलाई उचित राहात र जोखिममा परेका घरपरिवारलाई सुरक्षित स्थानमा व्यवस्थापन गर्न जिल्लाका सुरक्षा प्रमुखहरूलाई निर्देशन दिए ।
ब्रिफिङका क्रममा देउवालाई जिल्लामा भएको क्षतिको प्राप्त सम्पूर्ण जानकारी गराएको र पाँच दिनदेखि अवरुद्ध जयपृथ्वी राजमार्ग सञ्चालनका लागि आग्रह गरेको बझाङका प्रमुख जिल्ला अधिकारी मोहन अधिकारीले बताए ।
‘मैले प्रधानमन्त्री ज्यूलाई जिल्लामा भएको मानवीय र भौतिक क्षतिको बारेमा जानकारी गराएको छु । प्रधानमन्त्री ज्यूले बाढीपहिरोबाट प्रभावित भएकालाई सरकारले राहत दिने र घर भत्किएकाहरूको घर निर्माणका लागि आर्थिक सहयोग गर्नेछ । बाढीपहिरोमा परि ज्यान गुमाएका, घरबारविहीन भएकाहरुलाई आवश्यक आर्थिक सहयोग प्रदान गर्ने निर्णय समेत भएको हुँदा प्रभावित क्षेत्रका नागरिकको समस्या तत्कालै सम्बोधन गर्नु भनेर निर्देशन दिनुभएको छ,’ प्रजिअ अधिकारीले भने ।
प्रधानमन्त्री देउवासँग आएको निरीक्षण टोलीमा अर्थमन्त्री जनार्दन शर्मा, संस्कृति, पर्यटन तथा नागरिक उड्यानमन्त्री प्रेमबहादुर आले नेपाली कांग्रेसका नेता एवं पूर्वमन्त्रीहरू एनपी साउद, रमेश लेखक र वीरबहादुर बलायर सहभागी थिए ।
डोटी, बझाङ र बैतडीका बाढीपहिरो प्रभावित क्षेत्रको निरीक्षणपछि सो टोली डडेल्धुरा पुगेको छ ।
